कालीकोट — आफैले उत्पादन गरेको धान, चामल र लुगासहित नेपाल कम्युनिस्ट पार्टी अग्नी पीडितको दैलोमा पुगेको छ । असोज ३० गतेको आगलागीबाट प्रभावित भएका तिलागुफा–६ जुबिथाका प्रभावित परिवारको घरदैलोमा पुगेर विप्लव नेतृत्वको नेपाल कम्युनिस्ट पार्टीले खाद्यान्न सामाग्री वितरण गरेको छ ।
पार्टी स्थायी कमिटी सदस्य तथा सुदूरपश्चिम इन्चार्ज भरत सीको नेतृत्वमा आगलागी प्रभावित क्षेत्र जुबिथा पुगेर सोमबार पीडित परिवारलाई राहत वितरण गरिएको हो । तिलागुफा–६ का वडाध्यक्ष पर्वलाल शाहीमार्फत आगलागीबाट क्षति व्यहोरेका परिवारलाई सघाउन ‘जहाँ विपद्, त्यहाँ नेकपा’ भन्ने नाराका साथ राहत सामग्री हस्तान्तरण गरेको नेकपा प्रतिनिधि समिति सदस्य तथा काठमाडौं माहनगर ईन्चार डिआर सीले जानकारी दिए ।
रास्कोट–८ भात्तडी जिउलोमा खेती गरेर भित्र्याएको ३ बोरा धान, ५ बोरा चामल, काठमाडौंमा पार्टीले संचालन गरेको गार्मेन्टमा तयार पारिएका कपडासहित केही व्यवसायीबाट जुटाएको राहत सामग्री हस्तान्तरण गरेको उनको भनाई छ ।
पीडित परिवारका अगुवा मनराज शाहीले र वडा अद्क्ष प्रबलाल शाहीले आपत परेका बेला सहयोग उपलब्ध गराएकामा धन्यवाद दिए । जुबिथामा आगलागीमा परेर ३ घर पूर्णरूपमा क्षति हुँदा २६ परिवार प्रभावित भएका छन् ।