काठमाडौँ । काठमाडौँ निर्वाचन क्षेत्र नम्बर १ बाट प्रतिनिधिसभा सदस्यका उम्मेदवार तथा नेकपा माओवादी केन्द्रका केन्द्रीय सदस्य धनराज शाहीले श्रीमतीलाई साथमा लिएर घरदैलो कार्यक्रममार्फत चुनावी अभियानलाई तीव्र पारेका छन्। शाही दम्पतीले क्षेत्रका विभिन्न टोल र बस्तीमा पुगेर मतदातासँग प्रत्यक्ष भेटघाट गर्दै आफ्ना राजनीतिक एजेन्डा प्रस्तुत गरेका छन्।
घरदैलोका क्रममा केन्द्रीय सदस्य शाहीले शिक्षा, स्वास्थ्य, रोजगारी र सुशासनलाई आफ्नो प्रमुख प्राथमिकता रहेको बताएका छन्। “जनताको घरआँगनमै पुगेर समस्या सुन्नु र समाधानका लागि प्रतिबद्ध हुनु नै माओवादीको राजनीतिक संस्कार हो,” उनले भने, “काठमाडौँ–१ लाई समावेशी र दिगो विकासको नमूना क्षेत्र बनाउने हाम्रो लक्ष्य छ।”
अभियानमा श्रीमतीको सहभागिताले मतदातासँगको संवादलाई थप आत्मीय बनाएको स्थानीयको प्रतिक्रिया छ। विशेषगरी महिला, ज्येष्ठ नागरिक र युवासँगको भेटघाटमा सामाजिक सुरक्षा, महिला सशक्तीकरण र युवालाई उत्पादन तथा रोजगारीसँग जोड्ने विषयमा व्यापक छलफल गरिएको थियो।स्थानीय बासिन्दाले खानेपानी, फोहोर व्यवस्थापन, यातायात, स्वास्थ्य सेवा र सार्वजनिक पूर्वाधारका समस्या उठाएका छन्। ती समस्या समाधानका लागि संसद् र सरकार दुवै तहमा मजबुत रूपमा आवाज उठाउने प्रतिबद्धता शाहीले व्यक्त गरेका छन्।
काठमाडौँ क्षेत्र नम्बर १ मा चुनावी माहोल तातिँदै गएको छ भने नेकपा माओवादी केन्द्रका केन्द्रीय सदस्य धनराज शाहीको घरदैलो अभियानले मतदातामाझ सकारात्मक प्रभाव पारिरहेको देखिन्छ ।