काठमाडौं – रूसी राष्ट्रपति भ्लादिमिर पुटिनका प्रवक्ता दिमित्री पेस्कोभले अमेरिकी राष्ट्रपति डोनाल्ड ट्रम्पको पछिल्लो विदेश नीति रूससँग मिल्दोजुल्दो भएको बताएका छन्। युक्रेनका राष्ट्रपति भोलोदिमिर जेलेन्स्कीसँग ट्रम्प र अमेरिकी उपराष्ट्रपति जेडी भान्सको ह्वाइट हाउसमा भएको तनावपूर्ण भेटपछि पेस्कोभले यस्तो टिप्पणी गरेका हुन्।
पेस्कोभले रूसी सरकारी टेलिभिजनमा बोल्दै ट्रम्प प्रशासनले विदेश नीतिमा तीव्र परिवर्तन गरिरहेको र यो रूसको दृष्टिकोणसँग मेल खाने बताए। उनले ट्रम्पले अमेरिकालाई रूससँग नजिक ल्याइरहेको दाबी गरे।
ट्रम्पले गत वर्षको चुनावी अभियानमा रूस-युक्रेन युद्ध २४ घण्टाभित्र रोक्ने वाचा गरेका थिए। उनले युक्रेनलाई सैन्य सहायता रोकेर रूससँग वार्ता गर्न बाध्य पार्ने रणनीति लिएको अनुमान गरिएको छ।
ट्रम्पले राष्ट्रपति बनेपछि रूससँगको सम्बन्ध सुधारमा जोड दिएका छन्। उनले पुटिनसँग टेलिफोन वार्ता गरी युक्रेन युद्ध अन्त्यका लागि साउदी अरेबियामा वार्ता गर्ने घोषणा गरेका थिए। सो वार्तामा युक्रेन र युरोपेली देशहरूलाई आमन्त्रण गरिएको थिएन।
साउदी अरेबियाको रियादमा भएको वार्तामा अमेरिका र रूसले युक्रेनको भविष्यबारे छलफल गरेका थिए। ट्रम्पले युक्रेनलाई नेटो सदस्यता नदिने र रूसले कब्जा गरेको भूमि फिर्ता नहुने संकेत दिएका छन्।
ट्रम्पले युक्रेनलाई सैन्य सहायता जारी राख्नका लागि खनिज सम्झौता गर्न दबाब दिएको आरोप लागेको छ। जेलेन्स्कीले यस्तो सम्झौता अस्वीकार गरेपछि ट्रम्पले उनलाई तानाशाह भनेका थिए। ट्रम्पले पुटिनको तानाशाही शासनबारे भने कुनै टिप्पणी गरेका छैनन्।