माओवादी केन्द्रको तराई-मधेस जागरण अभियान बीचमै स्थगित, नेताहरू राजधानी फर्कँदै
नेकपा (माओवादी केन्द्र)ले हुलाकी राजमार्ग केन्द्रित तराई-मधेस जागरण अभियानलाई आइतबारदेखि अकस्मात स्थगित गरेको छ। फागुन १२ गते झापाको कचनकवलबाट सुरु भएको यो अभियान बारा, पर्सा र चितवनमा पुग्नुअघि नै रोकिएको हो।
देशको वर्तमान राजनीतिक परिस्थितिको समीक्षा गर्दै पार्टीले तत्कालका लागि अभियानलाई रोकेर काठमाडौं फर्कने निर्णय गरेको छ। पार्टी महासचिव देव गुरुङका अनुसार, सबै नेताहरू काठमाडौं पुगेपछि पदाधिकारी बैठक बसेर थप निर्णय लिइनेछ।
महासचिव गुरुङले देशको पछिल्लो अवस्थालाई मध्यनजर गर्दै अभियान स्थगित गरिएको बताए। बैठकमा देशको राजनीतिक परिस्थितिको विश्लेषण गरी आगामी कार्यक्रम तय गरिनेछ।
माओवादीको यो अभियान झापाबाट रौतहटसम्म पुगेको थियो। बारा, पर्सा, चितवन, नवलपुर, नवलपरासी, रुपन्देही, कपिलवस्तु, दाङ, बर्दिया, बाँके, कैलाली र कञ्चनपुरमा यो अभियान पुग्न बाँकी छ।
अभियानमा माओवादी केन्द्रका अध्यक्ष पुष्पकमल दाहाल ‘प्रचण्ड’ लगायत पार्टीका अधिकांश शीर्ष नेताहरूको सहभागिता रहेको थियो।