काठमाडौं – ११५ औं अन्तर्राष्ट्रिय श्रमिक महिला दिवसको अवसरमा काठमाडौंमा विभिन्न महिला संगठनहरूले र्यालीसहित संयुक्त कार्यक्रम आयोजना गरेका छन्। नेपाल कम्युनिस्ट पार्टी निकट अखिल नेपाल महिला संघ क्रान्तिकारीसहित पाँच संगठनले बानेश्वरमा जुलुस र सभा गरी दिवस मनाएका हुन्।
कार्यक्रममा अखिल नेपाल महिला संघ क्रान्तिकारीका अध्यक्ष बन्धु सीले समाजवादमा मात्र महिलाको मुक्ति सम्भव रहेको दाबी गरिन्। उनले सडकमा मकै, चटपटे र साग बेच्ने महिलाहरूको जीवनको प्रत्याभूति राज्यले कहिले दिने भनी प्रश्न गरिन्।
अखिल नेपाल महिला संघ (क्रान्तिकारी)की केन्द्रीय सदस्य अमृता थापाले समानुपातिक र समावेशीको नाममा अस्थिर सरकारको भ्रम फैलाइएको भन्दै खबरदारी गरिन्। अखिल नेपाल समाजवादी महिला संगठनकी केन्द्रीय अध्यक्ष जयन्ती राईले महिलाहरू एकजुट भएर सशक्त रूपमा लाग्नुपर्नेमा जोड दिइन्।
भृकुटीमण्डपबाट सुरु भएको र्याली बानेश्वरमा सभामा परिणत भएको थियो। कार्यक्रममा विभिन्न पार्टी र संगठनका नेता-कार्यकर्ता सहभागी थिए। नेपाल समाजवादी महिला संघकी नेता कल्पना सुवेदीको अध्यक्षतामा भएको कार्यक्रमको सञ्चालन अखिल नेपाल महिला संघकी केन्द्रीय अध्यक्ष मीना पुनले गरेकी थिइन्।