नेपाल कम्युनिष्ट पार्टी (नेकपा) का स्थायी समिति सदस्य भरत सीले देशलाई गफ मात्र गर्ने नभई काम गरेर देखाउने नेता र पार्टीको आवश्यकता रहेको बताएका छन्। शनिबार कालिकोटको रुप्सास्थित चिसापानीमा त्रिवेणी साझेदारी भेडाफर्मको उद्घाटन कार्यक्रममा बोल्दै उनले यस्तो धारणा राखेका हुन्।
उनले नेकपा र त्यसका महासचिव विप्लव मात्रै देशलाई आवश्यक परेको काम गर्न सक्ने पार्टी र नेता भएको दाबी गरे। भरत सीले नेपाललाई आत्मनिर्भर बनाउन आफ्नै उत्पादनमा जोड दिनुपर्ने बताए। अहिलेको पुँजीवादी व्यवस्थाले जनता र शहीद परिवारको सपना पूरा नगरेको भन्दै उनले समाजवादी व्यवस्थाको आवश्यकता औंल्याए। अबको क्रान्ति उत्पादनमा केन्द्रित हुनुपर्ने उनको भनाइ थियो।
कार्यक्रममा युवा संगठन नेपालका केन्द्रीय अध्यक्ष दिनेश सीले युवाहरूलाई विदेशमा भन्दा स्वदेशमै श्रम गर्न प्रेरित गर्नुपर्ने बताए। महासचिव विप्लव स्वयं भेडाफर्मको उद्घाटन गर्न दुर्गम क्षेत्रमा पुग्नुलाई उनले सामान्य घटनाको रूपमा नलिन आग्रह गरे।
जनपत्रकार संगठन नेपालका केन्द्रीय सचिव वसन्त विकले नेकपाले भेडापालन गरेर र महासचिव विप्लव चार घण्टा पैदल हिँडेर दुर्गम ठाउँमा पुगेर उद्घाटन गर्नु ऐतिहासिक कार्य भएको बताए। अन्य कुनै पनि पार्टीका नेताले यस्तो काम गर्न नसकेको उनको भनाइ थियो।
नेपाली कांग्रेसका प्रतिनिधि हरी बोगटी र वडा नम्बर ५ का वडासचिव पर्व बोगटीले नेकपाको भेडापालनको प्रयासलाई प्रशंसा गर्दै अन्य पार्टीका नेताहरूले पनि यसबाट सिक्नुपर्ने सुझाव दिए।