काठमाडौं – नेकपा (एमाले) का महासचिव शंकर पोखरेलले पूर्वप्रधानमन्त्री पुष्पकमल दाहाल ‘प्रचण्ड’ नेतृत्वको सरकारको पालामा माओवादी नेताहरूले ८ क्विन्टल सुन तस्करी गरेको गम्भीर आरोप लगाएका छन्। बाँकेमा आयोजित एक पार्टी कार्यक्रमलाई सम्बोधन गर्दै पोखरेलले माओवादी नेताहरूले पशुपतिमा पित्तलको जलहरी चढाएको भन्दै हल्ला फैलाएको तर सुन तस्करीमा संलग्न रहेको दाबी गरे।
उनले पशुपतिनाथ मन्दिरमा सुनको जलहरी राख्न सरकारले बजेट दिएको भए पनि माओवादी नेताहरूले संसद्मै उभिएर जलहरी सुनको नभई पित्तलको रहेको आरोप लगाएको बताए। यद्यपि, छानबिनपछि जलहरी सुनकै भएको पुष्टि भएको उनको भनाइ छ।
‘जलहरी सुनकै हो भन्ने प्रमाणित भइसक्दा पनि माओवादीले त्यहीँबाट सुन तस्करीको खेल खेल्यो,’ पोखरेलले भने, ‘अहिलेसम्म माओवादीका थुप्रै नेताहरू सुन तस्करीको आरोपमा तानिइसकेका छन्। त्यतिबेला मात्र ८ क्विन्टल सुन अवैध रूपमा तस्करी भएको प्रमाण भेटिएको छ।’
माओवादी नेतृत्वको सरकार भ्रष्टाचारका ठूला मुद्दाहरूको छानबिन हुन थालेपछि सत्ता छोड्न बाध्य भएको पोखरेलको दाबी छ। ‘माओवादीले राज्यसत्ताको दोहन गरेर भ्रष्टाचारको जालो बुन्यो। जब ठूला छानबिन प्रक्रिया अघि बढ्न थाल्यो, उनीहरू सरकारबाट बाहिरिए। जनयुद्धका नाममा गरेका अपराधहरूलाई शान्ति सम्झौताको ढाल बनाएर उम्किन खोजे, तर सत्य लुक्दैन,’ उनले भने।
पोखरेलले माओवादी नेतृत्वको विगतका गतिविधिहरूको पुनः समीक्षा आवश्यक रहेको भन्दै भ्रष्टाचार र तस्करीका घटनामा संलग्न जो–कोहीलाई कारबाहीको दायरामा ल्याउनुपर्ने बताए।