नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ ले नेपाली कम्युनिष्ट आन्दोलनलाई २००६ सालकै अवस्थामा फर्काउने गरी एकीकरणको प्रयास भइरहेको बताएका छन्। ललितपुरमा समाजवादी मोर्चाले शनिबार आयोजना गरेको पत्रकार सम्मेलनमा बोल्दै उनले यो कुरा बताएका हुन्।
उनले अहिले कम्युनिष्ट आन्दोलनलाई नयाँ अवधारणामा रुपान्तरण गरी माओवादी मात्र नभई समाजवादी शक्तिहरूलाई पनि एक ठाउँमा ल्याउने प्रयास भइरहेको बताए। उनले भने, “हामी नेपालको समग्र कम्युनिष्ट आन्दोलनलाई २००६ सालकै अवस्थामा फर्काउन सकिन्छ कि सकिँदैन भन्ने सोचिरहेका छौँ। माओवादीहरूलाई मात्र एक ठाउँमा ल्याउने होइन, समाजवादीहरूलाई पनि एकै ठाउँमा ल्याएर २००६ सालकै झल्को दिने गरी अघि बढ्ने बारेमा छलफल भइरहेको छ।”
महासचिव चन्दले नेपाली कम्युनिष्ट आन्दोलनलाई नयाँ अवधारणामा रुपान्तरण गर्ने गरी अघि बढिरहेको बताए।