काठमाडौं – पर्सामा माध्यमिक शिक्षा परीक्षा (एसईई) को क्रममा मर्यादा विपरीत कार्य गरेको आरोपमा चार जना निरीक्षकलाई जिम्मेवारीबाट हटाइएको छ।
पर्साका प्रमुख जिल्ला अधिकारी गणेश अर्यालको अध्यक्षतामा बसेको एसईई परीक्षा समन्वय समितिको बैठकले यो निर्णय गरेको हो। बैठकले माइस्थान विद्यापीठ माध्यमिक विद्यालयका केन्द्राध्यक्ष मुनिलाल कर्णलाई परीक्षाको मर्यादा र अनुशासनमा लापरवाही गरेको भन्दै सचेत गराएको छ। सोही केन्द्रका सहायक केन्द्राध्यक्ष जयप्रकाश सर्राफलाई परीक्षा अवधिभर केन्द्रमा प्रवेश गर्न रोक लगाइएको छ।
त्यस्तै, नेपाल राष्ट्रिय माध्यमिक विद्यालय, मसिहानी र नेपाल राष्ट्रिय माध्यमिक विद्यालय, निचुटा परीक्षा केन्द्रमा अभिभावक संघलगायत अनधिकृत व्यक्तिको प्रवेश देखिएपछि केन्द्रका केन्द्राध्यक्षलाई लिखित रूपमा ध्यानाकर्षण गराइएको छ। नेपाल राष्ट्रिय माध्यमिक विद्यालय, मसिहानी केन्द्रमा निरीक्षकको रूपमा खटिएका शिक्षक लालबाबु यादवलाई परीक्षाको मर्यादा विपरीत कार्य गरेको भन्दै जिम्मेवारीबाट हटाइएको छ। सिद्धार्थ माध्यमिक विद्यालय चिनी कारखाना वीरगञ्ज परीक्षा केन्द्रका निरीक्षक धमेन्द्र पाण्डे र रामबालक यादवलाई पनि जिम्मेवारीबाट हटाइएको छ।