काठमाडौं – पूर्वराजा ज्ञानेन्द्र शाहले गोरखा भ्रमणका क्रममा देशवासीको सुख र समृद्धिको कामना गरेका छन्। गोरखकाली मन्दिरमा पूजाअर्चनापछि सञ्चारकर्मीहरूसँग कुरा गर्दै उनले देशमा शान्ति आवश्यक रहेको बताए।
“अहिले देशमा शान्ति चाहिएको छ। कसैले कसैको कुभलो नचिताओस्। भलो चिताओस्। केही खराब नचिताओस् भन्ने मेरो कामना छ,” उनले भने।
गोरखा आफ्नो पुर्खाको थलो भएकोले यहाँ आउन पाउँदा खुसी लागेको उनले बताए। “गोरखा आएर मलाई खुसी लाग्यो। आफ्नो जन्मथलो त होइन, तर पुर्खाको थलो हो,” उनले भने।
देशमा कोही पनि नडराउनुपर्ने र शान्ति कायम हुनुपर्ने उनको भनाइ थियो। “कोही पनि केही गर्नलाई पनि डराउनु पर्दैन। देशको शान्ति कायमै होस्। देशमा सुख होस्। सबैलाई सुख र समृद्धि होस् भन्ने मेरो कामना छ,” उनले भने।
शनिबार बिहान १० बजे गोरखा दरबारस्थित गोरखनाथ मन्दिर पुगेका पूर्वराजा शाहलाई मन्दिरका पुजारीहरूले स्वागत गरेका थिए। उनले करिब दुई घण्टा गोरखनाथ र गोरखकाली मन्दिरमा पूजाअर्चना गरे।
गोरखनाथ र शाहवंशीय राजाहरूको राजपाठबीच विशेष सम्बन्ध रहेको इतिहासमा उल्लेख छ। गोरखनाथको आशीर्वादले तत्कालीन राजाहरूले युद्ध जितेको र नेपाल एकीकरणमा पृथ्वीनारायण शाह सफल भएको मानिन्छ।