काठमाडौं – नेपाली कांग्रेसका प्रभासालि नेता डा. शेखर कोइरालाले नयाँ सरकार बनाउन हिजो सहमति गरेका दुईवटै दलले पहिला को प्रधानमन्त्री बन्छ भन्ने कुरामा अल्झिन नहुने बताउनु भएको छ ।
वीरगन्जमा मंगलबार स्वर्गीय गिरिजाप्रसाद कोइरालाको सालिक अनावरण समारोहलाई सम्बोधन गर्दै नेता कोइरालाले दुई पार्टीबिच भएको सहमतिलाई ‘सिरियस’रूपमा लिनुपर्ने बताएका हुन् । उनले आपसी सहमतिलाई गम्भीरताका साथ पालना गर्न आग्रह गरे ।
उनले भने, ‘अहिलेको देशको परिस्थिति जटिल छ, त्यसकारण प्रधानमन्त्री को पहिला बन्छ ? को मन्त्री बन्छ भन्ने कुरा अलमलिनु जरुरी छैन । यसैमा अहिले अल्झियो भने समस्या हुन्छ । जे सहमति भएको छ, त्यो पालना गरेर सबैले अगाडि बढेमा मात्र सफलता मिल्छ ।’
उनका अनुसार देशमा अहिलेको आवश्यकता पार्टी भन्दामाथि उठेर राष्ट्रलाई सम्झिनुपर्ने बेला आएको छ । त्यसकारण कांग्रेस–एमालेसहितका दलहरूले आफ्नो ढिपी कसेर बस्नुभन्दा पनि पार्टी भन्दामाथि उठेर राष्ट्रलाई प्राथमिकतामा राख्न उनको सुझाव छ ।
पछिल्लो समय मुलुकमा राजनीतिज्ञहरू, कर्मचारीतन्त्र र व्यवसायीहरूको मिलेमतोमा देशलाई अप्ठ्यारो अवस्थामा पारेको उनले आरोप लगाए । देशकै सचिव, राजनीतिज्ञ, व्यापारीसहितका उच्च सरकारी अधिकारीहरूमाथि लागेको भ्रष्टाचारको मुद्दाले नै त्रिपक्षीय मिलेमतोमा देशमा भ्रष्टाचार भइरहेको पुष्टि गरेको स्पष्टोक्ति छ ।
नयाँ बनेको गठबन्धनले लुटतन्त्र मच्चाउने कर्मचारी, राजनीतिज्ञ र व्यवसायीहरूबिचको ‘नेक्सस’लाई तोड्न जरुरी रहेको उनको भनाइ छ । योसँगै वर्तमान गठबन्धनले संविधान सुधार, सुशासन, भ्रष्टाचार नियन्त्रण र आम जनतालाई राहत दिने कुराहरूमा ध्यान दिन सुझाव दिँदै उनले कांग्रेस र एमालेबिच भएको सहमति गाउँ गाउँसम्म पुर्याउन नेता कार्यकर्ताहरूलाई निर्देशन दिए ।