कालिकोट – नेपाल कम्युनिष्ट पार्टीका महासचिव विप्लव सीले नेपालको राजनीतिलाई आफ्नो खुट्टामा उभ्याउन उत्पादनमा जोडिनु
पर्ने र विदेशीको अगाडि झुक्ने ठाउँमा पुगेको टिप्पणी गरेका छन् ।
नेकपा कालिकोटले फोईमा आयोजना गरेको स्याउ रोपन कार्यक्रमको उद्घाटनका लागि फोईमा पुगेका महासचिव विप्लव सीले स्वागतपछि सम्वोधन गर्दै नेपालको राजनीति उत्पादनसँग नजोडिदा विदेशीको आगाडि झुक्ने ठाउँमा पुगेको टिप्पणी गरेका हुन् ।
उनले नेपालको ६०/७० वर्षको राजनीति एक अर्कोको आलोचनामा मात्र घुमेको र उत्पादनबाट विमुख भएको बताए ।
उनले भने ‘६०/७० वर्षको राजनीतिमा कृषि उत्पादनमा जोड दिएन, उद्योग कलकारखाना बनाउनेमा जोड दिएन, थोरै भएको पैसा पनि सहि सदुपयोग भएन, जनताको जीवन परिवर्तन हुने गरी उत्पादनको योजना कुनै पार्टीसंग भएन । जसले गर्दा देशका नेताहरु दलाल हुन थाले । विदेशीको मुख ताकेर बस्ने भए । यो कुराले नेपाल पछाडि पर्यो ।’
उनले नेपालका अरु राजनीतिक पार्टीहरु देशको उत्पादनमा नलागेर सरकार ढाल्ने र बनाउने खेलमा मात्र लागेको आरोप लगाए ।
महासचिव विप्लवले नेपालका सबै पार्टीहरु चन्दा मागेर खाने, भ्रष्टाचार कमिसन खाएर चल्ने गरेको भन्दै नेकपा भने आत्मनिर्भरको आर्थिक क्रान्तिमा लागेको दाबी गरे ।
महासचिव विप्लवले नेता कार्यकता र पार्टीलाई आत्मनिर्भर बनाउदै जनतालाई समेत आत्मनिर्भर बनाउनका लागि जुम्ला कालिकोटमा स्याउ रोप्न पुगेको बताए ।
उनले देशभर नेकपा उत्पादनमा केन्द्रीत भएकोे र डेढ वर्षमै पार्टीलाई आत्मनिर्भर बनाउने ठाउँमा पुगेको जिकिर गरे ।