काठमाडौं – त्रिभुवन विश्वविद्यालय स्वतन्त्र विद्यार्थी युनियन (स्ववियु) को निर्वाचनको तयारी तीव्र भएको छ। आगामी चैत ५ गते हुने निर्वाचनका लागि आज देशभरका क्याम्पसहरूमा विद्यार्थी संघ/संगठनहरूले आफ्नो दर्ता गराउँदै छन्। दर्ता प्रक्रिया आज अपराह्न ३ बजेसम्म चल्नेछ।
निर्वाचन तालिकाअनुसार, फागुन २१ गते मतदाता नामावली प्रकाशित गरिनेछ भने २५ गतेसम्म मतदाता नामावलीमाथि दाबी विरोध गर्न सकिनेछ। सोही दिन दाबी विरोधको छानबिन गरी अन्तिम मतदाता नामावली सार्वजनिक गरिनेछ।
फागुन २६ गते उम्मेदवार मनोनयन पत्र वितरण गरिनेछ र २७ गते प्रत्यक्ष र समानुपातिक दुवैतर्फका उम्मेदवारहरूको मनोनयन दर्ता गरिनेछ। सोही दिन उम्मेदवारको नामावली प्रकाशित हुनेछ।
फागुन २८ गते उम्मेदवारको नामावलीमाथि दाबी विरोध गर्न सकिनेछ र सोही दिन छानबिन गरी उम्मेदवारको अन्तिम नामावली प्रकाशित गरिनेछ।
फागुन २९ गते उम्मेदवारहरूले आफ्नो नाम फिर्ता लिन सक्नेछन् र सोही दिन उम्मेदवारको अन्तिम नामावली सार्वजनिक गरिनेछ।
चैत ५ गते बिहान ८ बजेदेखि अपराह्न ४ बजेसम्म मतदान हुनेछ र विद्यार्थीहरूले आफ्नो नेतृत्व चयन गर्नेछन्।