काठमाडौं – विपक्षी चारदलीय समाजवादी मोर्चाले आज दिउँसो आफ्नो नियमित बैठक बोलाएको छ। नेकपा एकीकृत समाजवादीको पार्टी कार्यालय, आलोकनगरमा दिउँसो ३ बजे सुरु हुने बैठकको मुख्य एजेन्डा चैत १५ गते काठमाडौंमा आयोजना हुने विरोध सभाको तयारी रहेको छ।
नेपाल समाजवादी पार्टी (नेसपा) का सहअध्यक्ष गङ्गानारायण श्रेष्ठका अनुसार, यसअघि चैत ९ गते जनकपुरमा हुने भनिएको विरोध सभा तयारी अभावका कारण स्थगित गरिएको छ। मोर्चाले चैत २ गते बौद्धिक वर्गसँग अन्तरक्रिया गर्ने कार्यक्रम पनि तय गरेको छ।
फागुन २७ गते बसेको मोर्चाको बैठकले वर्तमान सरकारप्रति असन्तुष्टि जनाउँदै राजावादी शक्तिहरूको बढ्दो गतिविधिलाई रोक्न काठमाडौंमा विरोध सभा आवश्यक रहेको निष्कर्ष निकालेको थियो। फागुन २५ गते पूर्वराजा ज्ञानेन्द्र शाहको त्रिभुवन अन्तर्राष्ट्रिय विमानस्थलमा भएको स्वागतमा ठूलो संख्यामा मानिसको उपस्थिति देखिएको थियो, जसलाई मोर्चाले व्यवस्थामाथिको चुनौतीको रूपमा व्याख्या गरेको छ।