कालिकोटको – पलाँता गाउँपालिका-२ लार्फमा आइतबार राति भएको ट्र्याक्टर दुर्घटनामा परी चालकसहित चार जनाको दुःखद निधन भएको छ।
पलाँता गाउँपालिका-९ थिर्पुबाट खुद्रा तथा खाद्यान्न सामग्री लिएर खिनको छलाहातर्फ जाँदै गरेको ट्र्याक्टर राडुनेटा लार्फ भन्ने स्थानमा राति करिब ११:३० बजे दुर्घटनामा परेको जिल्ला प्रहरी प्रमुख टेक बहादुर रावतले जानकारी दिए।
दुर्घटनामा परी ज्यान गुमाउनेहरूमा मुगु खत्याड-५ घर भएका २५ वर्षीय ट्र्याक्टर चालक चन्द्र प्रकाश रोकाया, पलाँता-५ का २६ वर्षीय अम्बा शाही, पलाँता-४ का २१ वर्षीय सदु बुढा र पलाँता ४ का २१ वर्षीय रबिन्द्र बिक रहेका छन्।
घटनाको जानकारी पाउनासाथ कहरदेव अस्थाइ प्रहरी चौकीबाट वरिष्ठ हवलदार गगन रावतको नेतृत्वमा प्रहरी टोली घटनास्थलमा पुगेको डीएसपी रावतले बताए। प्रारम्भिक अनुसन्धान अनुसार ट्र्याक्टरको नम्बर प्लेट मेटिएको र ब्लु बुक पनि फेला नपरेको प्रहरीले जनाएको छ। दुर्घटनाको गम्भीरतालाई दर्शाउँदै ट्र्याक्टरको इन्जिन सडकबाट २०० मिटर तल तथा ट्रली ६०० मिटर तल खोचमा खसेको अवस्थामा भेटिएको छ।
स्रोत: कान्तिपुर दैनिक