काठमाडौं – राष्ट्रिय परीक्षा बोर्डले आजदेखि देशभर एकसाथ कक्षा १२ को वार्षिक परीक्षा सुरु गरेको छ। बिहान ८ बजेदेखि ११ बजेसम्म सञ्चालन हुने यो परीक्षा आगामी जेठ २ गतेसम्म जारी रहनेछ।
यस वर्षको परीक्षाका लागि देशभर १ हजार ५९० परीक्षा केन्द्र र जापानमा १ गरी जम्मा १ हजार ५९१ केन्द्र निर्धारण गरिएको छ। राष्ट्रिय परीक्षा बोर्डका अध्यक्ष महाश्रम शर्माका अनुसार काठमाडौं उपत्यकामा सबैभन्दा बढी १६२ र मनाङ–मुस्ताङमा सबैभन्दा कम १-१ परीक्षा केन्द्र तोकिएको छ।
परीक्षालाई व्यवस्थित र मर्यादित बनाउन देशभर २० हजार सुरक्षाकर्मी, करिब दुई हजार कर्मचारी र प्रत्येक केन्द्रमा कम्तीमा एक कार्यालय सहयोगी परिचालन गरिएको छ। यस परीक्षामा पाँच हजार २०२ विद्यालयका नियमिततर्फ तीन लाख ९५ हजार ९०८ र आंशिकतर्फ एक लाख १५ हजार ६१७ गरी कुल पाँच लाख ११ हजार ५२५ विद्यार्थी सहभागी हुनेछन्।
परीक्षा नियन्त्रक कृष्णप्रसाद शर्माले जानकारी दिए अनुसार कम श्रवणशक्ति, दृष्टिविहीन, सुस्त मनस्थिति वा अन्य अपाङ्गता भएका परीक्षार्थीका लागि विशेष व्यवस्था गरिएको छ। कारागार र बाल सुधारगृहमा रहेका विद्यार्थीहरूका लागि पनि परीक्षा दिने व्यवस्था मिलाइएको छ।
परीक्षा केन्द्रमा जिल्ला परीक्षा समन्वय समिति वा परीक्षा नियन्त्रकको अनुमतिबिना कसैलाई प्रवेश गर्न दिइने छैन। परीक्षाको मर्यादा उल्लङ्घन गर्ने जो कोहीलाई पनि तत्काल परिवर्तन गर्न सकिने व्यवस्था गरिएको छ। परीक्षा अवधिभर केन्द्राध्यक्षबाहेक अन्य कसैलाई पनि मोबाइल फोन लैजान निषेध गरिएको छ। विद्यार्थीहरूलाई परीक्षा हलभित्र मोबाइल, स्मार्ट घडी र लोडेड डकुमेन्ट नभएको क्याल्कुलेटरबाहेक अन्य इलेक्ट्रोनिक उपकरण लैजान रोक लगाइएको छ।
आज परीक्षाको पहिलो दिन अनिवार्य अङ्ग्रेजी, संस्कृत रचना, बुद्ध शिक्षा र उर्दू व्याकरण विषयको परीक्षा सञ्चालन भइरहेको छ।