काठमाडौं – प्रमुख प्रतिपक्षी दल नेकपा (माओवादी केन्द्र) का अध्यक्ष पुष्पकमल दाहाल प्रचण्डले दुई तिहाइ सरकारको अहङ्कारको बेलुन फुटिसकेको टिप्पणी गरेका छन्।
प्रतिनिधि सभामा सोमबार आगामी आर्थिक वर्षको नीति तथा कार्यक्रममाथिको छलफलमा भाग लिँदै अध्यक्ष प्रचण्डले सरकारले महिना दिन बितिसक्दा पनि नेपाल राष्ट्र बैङ्कमा गभर्नर नियुक्त गर्न नसकेको भन्दै यस्तो टिप्पणी गरेका हुन्।
उनले वर्तमान सरकार बनेको दश महिना पुग्दा पनि सुध्रिन नचाहेको आरोप लगाए। यो सरकार निश्चित वर्गको स्वार्थको लागि बनेको उनको दाबी थियो। सरकार सञ्चालन संयन्त्रका सदस्यहरूले बिचौलियाहरू प्रधानमन्त्रीको शयन कक्षसम्मै पुग्छन् भन्ने अभिव्यक्ति दिएको प्रसङ्ग उल्लेख गर्दै प्रचण्डले हरेक नियुक्ति र निर्णयमा स्वार्थी समूह हाबी भएको र जनताले सहज रूपमा सेवा पाउन नसकेको बताए।